ఈ వారం ఓ అరడజను సినిమాలు విడుదల అయ్యాయి. అందులో బాగా ప్రచారం పొందిన సినిమా… డ్రింకర్ సాయి. గత రెండు మూడు వారాలుగా అటు ప్రధాన మీడియా స్రవంతి లోనూ… ఇటు సోషియల్ మీడియా ఫ్లాట్ ఫాం మీదా బాగా బజ్ తెచ్చుకున్నాడు డ్రింకర్ సాయి. డెబ్యూ నటుడు ధర్మ, ఐశ్వర్య శర్మ జంటగా నటించారు. కిర్రాక్‌ సీత, రీతూ చౌదరి, పోసాని, భద్రం, సమీర్‌, కాంచి ఇతర పాత్రలు పోషించిన ఈ చిత్రానికి కిరణ్‌ తిరుమల శెట్టి దర్శకత్వం వహించారు. ఎవరెస్ట్ సినిమాస్, స్మార్ట్ స్క్రీన్ ఎంటర్ టైన్ మెంట్స్ బ్యానర్స్ పై బసవరాజు శ్రీనివాస్‌, ఇస్మాయిల్‌ షేక్‌, బసవరాజు లహరిధర్‌ సంయుక్తంగా నిర్మించారు. మరి ఇంత ప్రాచుర్యం పొందిన ఈ ఏడాది విడుదలైన చివరి చిత్రం… ప్రేక్షకుల్ని ఏమాత్రం ఆకట్టుకుందో చూద్దాం పదండి.
కథః తెల్లారి లేస్తే మందు, సిగరెట్టు లేనిదే ఉండలేడు
సాయి(ధర్మ), తల్లిదండ్రులు చనిపోవడంతో డాక్టరు అయిన తన మామ (శ్రీకాంత్ అయ్యంగార్) దగ్గర పెరిగి పెద్దవాడవుతాడు.. ఓ రోజు భాగి(ఐశ్వర్య శర్మ) ను చూసి ప్రేమలో పడతాడు. ఆమె. ప్రేమకోసం వెంటపడుతుంటాడు. కానీ అతనంటే భాగికి ఇష్టం లేదు. భాగి నేచురోపతిని ఇష్టపడుతుంది. నేచురోపతి గురువు వంతెన(భద్రం).తర్వాత ఆయనలా ఎదగాలనుకుంటుంది. అయితే సాయి ఎప్పుడు సిగరేట్లు తాగుతూ, డ్రింక్‌ చేస్తూ ఉంటారు. ఏ పని చేయడు. సాయిలోని ఈ లక్షణాల కారణంగా అతనంటే భాగికి ఇష్టం ఉండదు. కానీ తనని ఏమైనా చేస్తాడేమో అని ప్రేమిస్తున్నట్టు నటిస్తూ వుంటుంది. ఆమె పుట్టిన రోజున సాయి చేసిన పనికి ఛీ కొడుతుంది. అతనెవరో తెలియదని పొరిగింటి వారితో చెప్పి కొట్టిస్తుంది. అయినా అవేమీ పట్టించుకోకుండా ఆమె వెంటపడుతుంటాడు. అనంతరం సాయి ఫ్రెండ్‌ ఒకరు అతని గర్ల్ ఫ్రెండ్‌(రీతూ చౌదరీ) చేతిలో మోసపోతాడు. నా లాంటి పరిస్థితి నీకు రాకుండా చూసుకో అని చెబుతాడు. దీంతో సాయిలో అనుమానం స్టార్ట్ అవుతుంది. తన ప్రేమ విషయం తేల్చుకోవాలనుకుంటాడు. అతని ఫ్రెండ్‌ చెప్పినట్టుగానే జరుగుతుంది. తనకు ఇష్టం లేదని చెబుతుంది భాగి. అందుకు సాయి ఎలా రియాక్ట్ అయ్యాడు? భాగి ప్రేమను చివరకు పొందాడా? తదితర వివరాలు తెలియాలంటే సినిమా చూడాల్సిందే.
కథ… కథనం విశ్లేషణ:
రియాలిస్టిక్ స్టోరీస్ కి మంచి ఆదరణ వుంది. అందులోనూ లవ్ స్టోరీస్ కి ప్రేక్షకులు బాగా కనెక్ట్ అవుతారు.
యదార్థ సంఘటనలతో కూడిన సినిమాలను సరైన కథ… స్క్రీన్ ప్లే తో గ్రిప్పింగా తెరమీద ఆవిష్కరిస్తే బాక్సాఫీస్ వద్ద మంచి వసూళ్లు చేయడం ఖాయం. `డ్రింకర్ సాయి` ఇలాంటి ప్లాట్ తోనే తెరకెక్కింది. క్లాసీగా సాగే లవ్ స్టోరీ. రియలిస్టిక్‌ అంశాలతోనే ఈ మూవీని కూడా తెరకెక్కించారు. గతంలో చాలా సినిమాల్లో మనం చూసిన కథ లాగే అనిపించినా… చివర్లో వచ్చే ట్విస్ట్… ఎమోషనల్‌ గా ఉంటుంది. అందరూ బాగా కనెక్ట్ అవుతారు. మందు, సిగరేట్‌ వంటివి జీవితాలను ఎలా నాశనం చేస్తున్నాయనే అంశాన్ని కూడా ప్రేమ కథకు జోడించి ఓ మెసేజ్ కూడా ఇచ్చారు.
మందుకు బానిస అవుతున్న కుర్రాళ్లకి హితబోధ చేయడం నుంచి ఈ కథ స్టార్ట్ అవుతుంది. తన జీవితంలోకి సాయి ఎలా వచ్చాడు, తమ ప్రేమ కథ ఎలా స్టార్ట్ అయ్యిందనేది చెబుతుంది హీరోయిన్. . దీంతో ఫ్లాష్‌ బ్యాక్లోకి వెళ్తుంది. ప్రారంభంలో సీన్లు సరదాగా సాగుతుంటాయి. సాయి.. భాగి వెంటపటడంతోనే నడుస్తుంది. ఆమెకి ఇష్టం లేకపోయినా ప్రేమిస్తున్నా అని చెప్పడం దాన్ని మ్యానేజ్‌ చేయడం, అందుకు మరో ఫ్రెండ్‌ కిర్రాక్‌ సీతను వాడుకోవడం వంటి సీన్లు ఫన్నీగా సాగుతాయి. మరోవైపు సాయి ఫ్రెండ్‌ మందార పువ్వుకోసం తిరిగే తిరుగుడు కామెడీగా ఉంటుంది. ఇలా ఫస్టాఫ్‌ అంతా సరదాగా ఉంటుంది.
సెకండాఫ్‌లో కథ స్పీడందుకుంటుంది. నేచురోపతి గురువు వద్ద శిక్షణ, అక్కడ మరో చిన్న కుర్రాడు రావడం, సాయి కూడా రావడంతో మరోసారి ఫన్‌ వైపు వెళ్తుంది. కానీ అనంతరం చోటు చేసుకున్న సీన్లు సీరియస్‌గా మారుతాయి. చివర్లో హీరో పాత్రలోని ట్విస్ట్ ఎమోషనల్‌ వైపు టర్న్ తీసుకుంటుంది. అయా సన్నివేశాలు ఆద్యంతం ఆకట్టుకుంటాయి. ప్రీ క్లైమాక్స్ వరకు ఆడుతూ పాడుతూ అన్నట్టుగా తీసుకెళ్లి క్లైమాక్స్ లో గుండెని బరువెక్కిస్తారు దర్శకుడు. ఆయా సీన్లే సినిమాకి ఆయువు పట్టు. దీంతో ప్రారంభం నుంచి చూసిందంతా మర్చిపోయేలా చేస్తుంది. ఎమోషనల్‌గా ఆడియెన్స్ గుండెని బరువెక్కించి పంపిస్తుంది క్లైమాక్స్.
సాయి పాత్రలో ధర్మ మాస్ లుక్స్ బాగా ఆకట్టుకుంది.. నటుడిగా మంచి భవిష్యత్‌ ఉందని చెప్పొచ్చు. డాన్సులు బాగా చేశాడు, ఆరోగెంట్‌ సీన్లు, ఎమోషన్స్ సీన్లలో బాగా మెప్పించాడు. ఇక భాగి పాత్రలో ఐశ్వర్య శర్మ క్యూట్‌గా ఆకట్టుకుంది. చూడ్డానికి చిన్న పిల్లలా ఉంది. కానీ నటనతో, ఎక్స్ ప్రెషన్స్ పరంగా బాగా చేసింది. అమ్మాయి ఫాదర్‌గా కాంచి తనకు బాగా సెట్‌ అయ్యే పాత్రలో ఒదిగిపోయాడు. కిర్రాక్‌ సీతకు మరో ప్రామినెంట్ రోల్‌ దక్కింది. భద్రం గురువు వంతెనగా కనిపించి ఆకట్టుకున్నాడు. మిగిలిన పాత్రలు ఓకే అనిపించాయి.
సినిమా టెక్నీకల్‌గా చాలా బాగుంది. రిచ్‌గా ఉంది. ప్రొడక్షన్‌ వ్యాల్యూస్‌ బాగున్నాయి. నిర్మాతలు రాజీపడకుండా నిర్మించారు. ఓ పెద్ద సినిమా రేంజ్‌ లో కనిపిస్తుంది. ప్రశాంత్‌ అంకిరెడ్డి కెమెరా వర్క్ అందంగా, కలర్‌ఫుల్‌గా ఉంది. మార్తాండ్‌ కె వెంకటేష్ తన అనుభవానికి పూర్తి స్థాయిలో పని చెప్పలేదనిపిస్తుంది. కొన్ని సీన్లు కట్‌ చేయాల్సింది. మ్యూజిక్‌ శ్రీవసంత్‌ బాగా చేశాడు. పాటలు కమర్షియల్‌ సినిమాలను తలపించాయి. బీజీఎం కూడా బాగానే చేశాడు. దర్శకుడు కిరణ్‌ తిరుమల ఎంచుకున్న రియల్‌ స్టోరీలో కొంత రెగ్యూలర్‌ ఎలిమెంట్లు ఉన్నా, నడిపించిన తీరు బాగుంది. క్లైమాక్స్ ని, ముగింపు విషయంలో బాగా చేశాడు. ఆడియెన్స్ ని ఎమోషనల్‌గా కనెక్ట్ చేశాడు. ఆ విషయంలో సక్సెస్‌ అయ్యాడు. చివరికి హీరో పాత్ర ద్వారా మందుబాబులకు, స్మోకర్స్ కి ఇచ్చిన సందేశం బాగుంది. నేచురల్‌గా ఉంది. గో అండ్ వాచ్ ఇట్.
రేటింగ్: 3.25
