ఎస్ జి ఎస్ వి మూవీస్ పతాకంపై బాలు చరణ్, కాజల్ తివారి హీరో హీరోయిన్ గా నర్తు చిరంజీవి దర్శకత్వం లో ఎమ్ పవన్ కుమార్ నిర్మించిన సస్పెన్స్ యాక్షన్ ఫ్యామిలీ ఎంటర్టైనర్ చిత్రం “సుగ్రీవ”. ఈ చిత్రం ఏప్రిల్ 24న విడుదల అయింది.
కథ: భర్త బాలు(బాలు చరణ్) భార్య ప్రశాంతి (కాజల్ తివారి) ప్రేమించి పెళ్లి చేసుకుని… అన్యోన్య దాంపత్యం సాగిస్తుంటారు. వీరికి ఒక కూతురు ఉంటుంది. ఆమె పేరు అక్షర. ముగ్గురు కలిసి మెలిసి సంతోషంగా జీవిస్తుంటారు. అయితే, ఒక విషాదకరమైన ప్రమాదం వారి కుటుంబ సంతోషాన్ని చిన్నాభిన్నం చేస్తుంది. అక్షర ఆసుపత్రి పాలవుతుంది, ఆమె ప్రాణాలు కాపాడాలంటే 50 లక్షల రూపాయల అవసరమవుతుంది. తన బిడ్డను కాపాడుకోవాలనే తపనతో, బాలు డబ్బుకోసం మాఫియా అనే చీకటి ప్రపంచంలోకి అడుగుపెడతాడు. పురాణాల్లోని సుగ్రీవుడి స్ఫూర్తితో, తన అపారమైన బలాన్ని, మేధస్సును ఉపయోగించి ఆ నేర ప్రపంచంలో బాలు ఎలా నెట్టుకొచ్చాడు? తన బిడ్డను కాపాడుకుని మళ్ళీ సాధారణ జీవితానికి ఎలా తిరిగి వచ్చాడు? అనేదే ఈ చిత్ర కథాంశం.
నటీనటుల పనితీరు:
బాలు చరణ్ టైటిల్ రోల్లో అద్భుతమైన నటనను కనబరిచారు. ఒక బాధ్యతాయుతమైన తండ్రిగా, నేర ప్రపంచంలో ఒక శక్తివంతమైన మనిషిగా ఆయన చూపించిన వైవిధ్యం మెప్పిస్తుంది. ముఖ్యంగా తన కూతురు ప్రాణాపాయంలో ఉన్నప్పుడు ఆయన పండించిన భావోద్వేగాలు ప్రేక్షకుల హృదయాలను హత్తుకుంటాయి. ప్రశాంతి పాత్రలో కాజల్ తివారీ చక్కగా ఒదిగిపోయారు. ప్రతినాయకుడిగా కరణ్ విజయ్ తన క్రూరత్వంతో బాలు పాత్రను మరింత ఎలివేట్ చేశారు. సుమన్ శెట్టి తన పాత్రతో కథకు బలాన్ని చేకూర్చారు. మిగిలిన సహాయ నటీనటులు కూడా తమ పరిధి మేరకు ఆకట్టుకున్నారు.
సాంకేతిక వర్గం:
దర్శకుడు చిరంజీవి నార్తు నాన్-లీనియర్ స్క్రీన్ ప్లేను సమర్థవంతంగా హ్యాండిల్ చేశారు. లక్కీ ఏకరి సినిమాటోగ్రఫీ సినిమాలోని రెండు విభిన్న ప్రపంచాలను (కుటుంబం మరియు మాఫియా) చక్కగా చూపించింది. అజేయ్ పట్నాయక్ అందించిన నేపథ్య సంగీతం గ్యాంగ్స్టర్ సన్నివేశాల్లో తీవ్రతను పెంచింది. విజయ్ కురాకుల మరియు నవనీత్ చారి సంగీతం ఇంకా మెరుగ్గా ఉండాల్సింది. బాబీ కడలి ఎడిటింగ్ సినిమా వేగాన్ని తగ్గకుండా చూసింది.
విశ్లేషణ:
‘సుగ్రీవ’ కేవలం ఒక యాక్షన్ డ్రామా మాత్రమే కాదు. ఇందులోని నాన్-లీనియర్ కథనం ప్రేక్షకుడిలో ఆసక్తిని కలిగిస్తుంది. బాలు గతాన్ని చూపిస్తూనే, వర్తమానంలోని ఉత్కంఠను దర్శకుడు కొనసాగించారు. బాలు ఒక ఆదర్శవంతమైన వ్యక్తిగా, భౌతిక సుఖాల కంటే ప్రేమ గొప్పదని నమ్మే వ్యక్తిగా కనిపిస్తాడు. అటువంటి వ్యక్తి నేర ప్రపంచంలోకి వెళ్లడం అనే అంశం కథలో విషాద ఛాయలను నింపుతుంది.
సినిమా ప్రారంభంలోని ఫైట్ సీక్వెన్స్ ఈ చిత్రానికి ఒక ప్రత్యేకమైన రూపాన్ని ఇచ్చాయి. గ్యాంగ్స్టర్ డ్రామాలోని ఇంటెన్సిటీ ‘పోకిరి’ వంటి చిత్రాలను గుర్తుకు తెస్తుంది. పాటల్లోని సాహిత్యం “విధి” ప్రాధాన్యతను వివరిస్తూ కథతో కలిసి సాగుతుంది.
చివరగా…
‘సుగ్రీవ’ ఒక ఉద్వేగభరితమైన ఎమోషనల్ థ్రిల్లర్.
రేటింగ్: 3/5
