మధురపూడి గ్రామం, రాఘవ రెడ్డి సినిమాలతో వరుస హిట్లు అందుకున్న శివ కంఠమనేని… తాజగా బిగ్ బ్రదర్ సినిమాతో ప్రేక్షకుల ముందుకు వచ్చాడు. కంటెంట్ వున్న సినిమాలు చేస్తూ… క్రిటిక్స్ నుంచి ప్రశంసలు అందుకున్నారు. భోజ్ పూరీ చిత్రాల్లో వరుస హిట్లు అందుకున్న గోసంగి సుబ్బారావు చాలా విరామం తర్వాత తెలుగులో డైరెక్టర్‌గా రీ-ఎంట్రీ ఇస్తున్నారు. లైట్ హౌస్ సినీ మ్యాజిక్ పతాకంపై కె.ఎస్.శంకర్ రావు, ఆర్.వెంకటేశ్వరరావు సంయుక్తంగా నిర్మించారు. అన్నదమ్ముల సెంటిమెంట్ ఆధారంగా తెరకెక్కిన ఈ చిత్రం ఎలా ఉందో చూద్దం పదండి.
కథ ఏమిటంటే…
శివ (శివ కంఠమనేని)కి తన తమ్ముడు సూర్య (శ్రీ సూర్య) అంటే ప్రాణం. తమ్ముడి కోసం ఆరాటపడుతుంటాడు. భయస్థుడైన తమ్ముడిని కంటికి రెప్పలా కాపాడుకుంటాడు. తన శత్రువుల నుంచి తమ్ముడు సూర్యకి ఏమైనా అవుతుందేమో అని ఆందోళన చెందుతుంటాడు. అందుకే తమ్ముడికి బయటకు వెళ్లొద్దని సూచిస్తాడు. కానీ సూర్య మాత్రం మాట వినడు. తన వదిన దుర్గ (ప్రియ హెగ్డే)కి మాయ మాటలు, కాకమ్మ కబుర్లు చెప్పి బయటకు వెళ్తుంటాడు. అలా బయటకు వెళ్లిన సూర్య పూజ (ప్రతీ)తో ప్రేమలో పడతాడు. అయితే ఓ సారి సూర్య, ప్రీతిల మీద అటాక్ జరుగుతుంది. ఆ అటాక్‌ను శివ, సూర్య ఇద్దరూ కలిసి ఎదుర్కొంటారు. అసలు ఇంతకీ పూజ ఎవరు? ఆమె ఫ్లాష్ బ్యాక్ ఏంటి? సూర్యకు, పూజకు ఎప్పుడు పరిచయం ఏర్పడుతుంది? ఎంగేజ్మెంట్ జరిగినా పదేళ్లు పెళ్లి చేసుకోకుండా శివ ఎందుకు దూరంగా ఉంటాడు? చివరకు సూర్య, పూజల ప్రేమ కథ ఏం అవుతుంది? అన్నది కథ.
బిగ్ బ్రదర్ అనే పేరుకు తగ్గట్టుగా అన్నయ్య శివ పాత్రలో శివ కంఠమనేని కనిపిస్తాడు. అన్నగా ఎంతో హుందాగా కనిపిస్తూ, నటిస్తూ అందరినీ మెప్పిస్తాడు. శివ కారెక్టర్‌లో చూపించాల్సిన ప్రేమ, కోపం ఇలా అన్ని ఎమోషన్స్‌ను శివ కంఠమనేని చూపించాడు. యాక్షన్ సీక్వెన్స్‌లో ఫుల్ ఎనర్జీతో కనిపించి మరీ ముఖ్యంగా మాస్ ప్రేక్షకుల్ని ఆకట్టుకుంటాడు. శివ పాత్ర తరువాత సూర్య కారెక్టర్ అందరినీ ఆకట్టుకుంటుంది. ఫస్ట్ హాఫ్‌లో భయస్తుడిలా నవ్విస్తాడు. లవర్ బాయ్‌గా ఆకట్టుకుంటాడు. ఇక సెకండాఫ్‌లో కాలేజీ కుర్రాడిలా, అల్లరి పాత్రలో మెప్పిస్తాడు. గౌరి పాత్రలో ప్రియ హెగ్డే, పూజ కారెక్టర్‌లో ప్రీతి గ్లామరస్‌గా మెప్పిస్తారు. నటనతో ఆకట్టుకుంటారు. భవానీ, దేవ్, మంత్రి పాత్రలు విలనిజాన్ని చూపించాయి. నానమ్మ పాత్ర అక్కడక్కడా కామెడీ పండించింది.
సినిమా ఎలా ఉందంటే…
ఫ్యామిలీ, యూత్ ఆడియెన్స్‌ను ఆకట్టుకునేలా బిగ్ బ్రదర్ కథను అన్ని యాంగిల్స్‌లో చక్కగా రాసుకున్నాడు. చక్కటి మాస్ ఫ్యామిలీ కమర్షియల్ సినిమాను చూసినట్టుగా అనిపిస్తుంది. ఫస్ట్ హాఫ్ అంతా కూడా ఫ్యామిలీ, వదిన మరిది, నాయనమ్మ అల్లరి చుట్టూ తిరుగుతుంది. అన్నా తమ్ముళ్ల రిలేషన్, వదిన ప్రేమ, నానమ్మ అల్లరి ఇలా అన్ని రకాల ఎమోషన్స్‌ను జోడించి ఫ్యామిలీ ఆడియెన్స్‌కు బాగా కనెక్ట్ అయ్యేలా రాసుకున్నాడు. కామెడీ కూడా బాగానే పండింది. ఫైట్స్, పాటలకు కరెక్ట్ ప్లేస్ మెంట్ దొరికింది. ఇక ఫస్ట్ హాఫ్ చూస్తేనే ఫుల్ మీల్స్ అన్నట్టుగా కనిపిస్తుంది. ఇంటర్వెల్ హీరోలిద్దరూ కలిసి చేసే ఫైట్ బాగుంటుంది.
సెకండాఫ్‌లో కథ ఎక్కువగా ఫ్లాష్ బ్యాక్‌లో సాగుతుంది. కాలేజ్ సీన్స్ బాగుంటాయి. ఆ ఎపిసోడ్స్ అన్నీ కూడా యూత్ ఆడియెన్స్‌ను టార్గెట్ చేసినట్టుగా కనిపిస్తుంది. హీరో హీరోయిన్ల మధ్య టామ్ అండ్ జెర్రీ వార్, ర్యాగింగ్ చేసుకోవడం, ప్రేమ పుట్టడం, హీరోయిన్ తండ్రి నుంచి వచ్చిన సమస్యలు.. ఇలా ప్రీ క్లైమాక్స్ వరకు కథ బాగా వెళ్తుంది. ఇక శివ ఫ్యామిలీ ఫ్లాష్ బ్యాక్ ఎపిసోడ్ అందరినీ కదిలిస్తుంది. క్లైమాక్స్‌లో తమ్ముడి ప్రేమను గెలిపించేందుకు అన్న చేసే పోరాటం, క్లైమాక్స్ యాక్షన్ సీక్వెన్స్ అన్నీ బాగుంటాయి. చివరకు కథ సుఖాంతం అవుతుంది.
బిగ్ బ్రదర్ మూవీకి సంగీతం ఓకే అనిపిస్తుంది. పాటలు వినడానికి, చూడటానికి బాగుంటాయి. సినిమాటోగ్రఫీ నేచురల్‌గా ఉంటుంది. ఇక ఫైట్స్ మాత్రం అద్భుతంగా అనిపిస్తాయి. ఫైట్ మాస్టర్ రామకృష్ణ పోరాట సన్నివేశాలను అద్భుతంగా కంపోజ్ చేశాడు. నిడివి తక్కువగానే ఉండటం ప్లస్. నిర్మాణ విలువలు బాగున్నాయి. గో అండ్ వాచ్ ఇట్.
రేటింగ్ : 3
