సమంత సినిమాలలోనే కాకుండా వెబ్ సిరీస్‌లు, అంతర్జాతీయ ప్రాజెక్టులతో బిజీగా ఉంటూ వస్తోంది. అలాంటిది ఆమె నిర్మాతగా అడుగుపెట్టి ‘శుభం’ అనే సినిమాను నిర్మించడమే కాకుండా, అందులో ఓ ప్రత్యేక పాత్రలో కూడా కనిపించింది. ఇక ఈచిత్రం రేపు విడుదలకానున్న నేపథ్యంలో టీమ్ ప్రీమీయర్స్‌ను వేసింది. మరీ ఈ సినిమా ఎలా ఉందో మన రివ్యూలో చూద్దాం.
కథ:
ఈ సినిమా కథ భీమిలిలోని ముగ్గురు స్నేహితుల చుట్టూ తిరుగుతుంది. అయితే ప్రతి రాత్రి 9 గంటలకు వారి భార్యలు ఓ సీరియల్ చూసేందుకు అతుక్కుపోతారు. ‘జన్మజన్మల బంధం’ అనే సీరియల్ టైం వచ్చిందంటే చాలు, వారు దానిలో లీనమై పోతారు. అటువంటి పరిస్థితుల్లో తమ భార్యలను మళ్లీ సాధారణ జీవితానికి తీసుకురావడం కోసం ఆ ముగ్గురు భర్తలు చేసే ప్రయత్నమే కథలో ప్రధాన అంశం. ఈ సంఘటనలకు ఊరిలోని ఇతర మహిళలు కూడా భాగమవడం కథను మరింత ఆసక్తికరంగా మార్చుతుంది.
దర్శకుడు ప్రవీణ్ కాండ్రేగుల ఈ కథను 2004 కాలపు నేపథ్యంతో తెరకెక్కించారు. అప్పటి డీటీహెచ్, కేబుల్ టీవీ రైజ్ వంటి పాయింట్లు కథలో చూపిస్తారు. సీరియల్స్‌కు అత్యధిక ప్రాధాన్యం ఇచ్చే ఆడవారి మానసిక స్థితి, వారికి సమాన గౌరవం అవసరమన్న సందేశం ఇందులో వినోదాత్మకంగా చెప్పారు. ముఖ్యంగా కామెడీతో పాటు ఎమోషనల్ టచ్ కూడా చక్కగా ఉందనే చెప్పోచ్చు. ప్రేక్షకుల్ని కొన్ని సీన్లలో భయపెట్టే ప్రయత్నం చేయడం కూడా బాగుంది. కథలో కీలక ట్విస్ట్‌ను స్పాయిల్ చేయకుండా ఉంచడం మంచి నిర్ణయం. సమంత తొలి సినిమాతోనే మహిళల జీవితాన్ని స్పృశించే మంచి ప్రయత్నం చేసిందనే చెప్పోచ్చు.
సమంత ఓ గెస్ట్ రోల్‌లో తాంత్రికురాలిగా ఆకట్టుకుంది. హీరోలుగా హర్షిత్ రెడ్డి, శ్రీనివాస్ రెడ్డి, చరణ్ చేసిన పాత్రల్లో మెప్పించారు. హీరోయిన్‌గా శ్రియా కొంతం, శ్రావణి, శాలినిలు బాగానే నటించారు. మిగిలిన నటీనటులు కూడా తమ పాత్రల మేరకు న్యాయం చేశారు
‘శుభం’ ఓ మంచి హారర్ కామెడీ అని అనోచ్చు. ఈ మూవీ సీరియల్స్ పట్ల మన ఆడవారి ఇష్టాన్ని వినూత్నంగా చూపించే ప్రయత్నం చేసింది. మహిళా శక్తిని హైలైట్ చేస్తూ సామాజిక సందేశం కూడా చక్కగా అందించింది. ఓ వినోదాత్మకమైన ఫ్యామిలీ ఎంటర్టైనర్ కావాలంటే ఈ సినిమా మంచి ఎంపిక అవుతుంది.
ప్లస్ పాయింట్స్
సమంత అప్పియరెన్స్
కథ… స్క్రీన్ ప్లే
కామెడీ
మెయిన్ లీడ్ రోల్స్
మైనస్ పాయింట్స్
సోల్ మిస్
రేటింగ్: 3.25
